Абази го гони Мерко за луксузниот автомобил купен со општински пари

Луксузното ауди ќе го седне Мерко во судница.

Обвинителството за гонење на организиран криминал и корупција го гони струшкиот градоначалник за злоупотреба на службената положба. Обвинет е дека со купување на возилото вредно 67 илјади евра го оштетил општинскиот буџет. Засега останува нејасно кој суд ќе го води предметот. Испратен е во Кривичниот во Скопје, но како што рече на брифинг со новинарите овинителот Ислам Абази, најверојатно предметот ќе патува во Струга.

„Очекуваме Кривичниот суд да се прогласи за ненадлежен, па ние нашиот предмет ќе го препратиме во обвинителството во Струга. Значи, ќе имаат готов производ“, изјави Ислам Абази, Шеф на ОЈОГОКК.

Од Кривичен велат дека веќе го добиле предметот кој е распореден кај судија и следната недела ќе биде познато дали Мерко ќе доаѓа во Скопје или ќе му се суди во Струга.

Струшкиот градоначалник лани беше ставен на американската црна листа заради сомнеж дека присвојувал пари и се мешал во судски процеси.

Обвинителот Абази денеска го одржа брифингот со новинарите кој го најави по преземање на функцијата пред повеќе од една година. Во друштво на државниот обвинител ги промовираше новите простории на обвинителството.