Американски федерален судија привремено го блокира Трамп да испраќа војници во Портланд

Американски федерален судија од Орегон вчера привремено го блокираше претседателот Доналд Трамп да испраќа војници на Националната гарда во Портланд, во оваа американска сојузна држава, јави ДПА.

Федералниот судија издаде привремена забрана со која се спречува администрацијата да ја стави Националната гарда на оваа држава под федерална контрола и да ја распореди во Портланд најмалку до 18 октомври. Судењето за случајот е закажано за 29 октомври.

Службеници на градот Портланд и државата Орегон поднесоа тужба минатата недела, нарекувајќи го планираното распоредување незаконско и наведувајќи дека оваа сојузна држава е надлежна за спроведувањето на законот и за постапувањето на Националната гарда, пренесе германската агенција.

Забраната претставува уште еден неуспех за Трамп, кој се обиде да распореди војници во големите градови, честопати предизвикувајќи широки протести. Калифорнискиот суд неодамна ѝ забрани на администрацијата да користи војници во Лос Анџелес за цели на спроведување на граѓанскиот закон.

Трамп постојано го наведува зголемениот криминал како оправдување за испраќање војници во градовите предводени од демократите.

Во САД, гувернерите обично ја контролираат Националната гарда во своите држави, иако претседателот може да ја преземе командата за време на војни или национални вонредни состојби. Националната гарда е воена резервна единица и дел од вооружените сили на САД, потсетува ДПА.

Трамп претходно нареди распоредување на Националната гарда, вклучително и во Лос Анџелес за справување со протестите против рациите на имиграциските власти и во главниот град Вашингтон, за справување со она што го опиша како зголемен криминал.

Гувернерот на Илиноис, вчера, исто така, ја обвини администрацијата на Трамп дека има намера да преземе контрола врз 300 војници на Националната гарда на Илиноис за нивно распоредување во Чикаго, ескалирајќи уште еден спор околу федералната интервенција во град предводен од демократите,  пренесува ДПА.

МИА