Аплауз за својата работа и без гости, Судски одбележува јубилеј

Без гости, аплауз за својата работа и потсетување на претходниците. Вака Судскиот совет го одбележа тридеценискиот јубилеј од своето постоење. Според претседелката, не било време за грандиозни прослави. Посакува советот да биде светла точка, а не центар на скандалите во правосудниот систем.

„Верувам дека значењето на јубилејот не се проценува само и единствено според помпезноста од неговото прославување. Скромно, но достоинствено одбележување прилега на Судскиот совет, барем во овој момент. Се надевам дека и во иднина Судскиот совет ќе биде видлив за јавноста, но не во негативна конотација, туку ќе биде видлив по позитивните чекори, активности и успеси кои ќе следуваат“, изјави Весна Дамева, Претседател на Судски совет.

Во свечениот говор, место обезбедија и препораките на оценската мисија на ЕУ, кои според Дамева ќе бидат поттик за независно судство ослободено од секакви притисоци.

„Верувам дека сега откако ќе ги имплементираме и препораките од извештајот на оценската мисија на ЕУ на што работиме посветено, ќе имаме и повод и прилика да одбележуваме постигнат успех и напредок затоа што постигнатата цел е причина која ќе имаме и други прилики за одбележување на работата на советот“, изјави Дамева.  

Поддршка за работата на Судски, советот доби и од американската амбасадорка Агелер. На денешната средба со претседателката порачала дека институцијата ја гледа како столб на независноста на судството.

„Амбасадорката Агелер посебно ја истакна потребата за борбата со корупцијата, независното, ажурното и непристрасното одлучување на Судскиот совет и судовите, а со цел обезбедување на владеење на правото и даде силна поддршка на Судскиот совет, во остварувањето на своите функции согласно со Уставот и законите, во насока на обезбедување и гарантирање на самостојноста и независноста на судската власт“.

На свеченоста дојде и претседателката на Врховен која е член на советот по функција. Покана добил и министерот за правда, но не можел да дојде заради презафатеност.