Баро: Ќе воведеме санкции кон Иран ако до август нема напредок во нуклеарниот договор

Франција, Велика Британија и Германија ќе го активираат механизмот на Обединетите нации за повторно воведување санкции против Иран најдоцна до крајот на август, доколку до тогаш не се постигне конкретен напредок во врска со нуклеарниот договор, изјави денеска францускиот министер за надворешни работи Жан-Ноел Баро.

– Франција и нејзините партнери имаат право повторно да воведат сеопфатно ембарго за оружје, банкарски трансакции и нуклеарна опрема што беше укинато пред десет години, изјави Баро пред новинарите во Брисел, во пресрет на состанокот на министрите за надворешни работи на Европската Унија.

Тој истакна дека механизмот за враќање на санкциите ќе биде активиран ако Иран не покаже „цврста, конкретна и проверлива обврска“ за почитување на договореното во рамки на нуклеарниот договор.