Британецот Пити и Американката Ледецки ја продолжија серијата светски рекорди

На третиот ден од Светското првенство во пливање што се одржува во Казањ попладнево беа поставени два светски рекорда. На 1.500 метри слободно кај жените Американката Кети Ледецки го собори сопствениот и светски рекорд, поставен вчера во квалификациите, додека Британецот Адам Пити во полуфиналето го собри светскиот рекорд на Камерон Ван дер Бург (ЈУжна Африка) поставен претпладнево на 50 метри градно.

Во финалето на 1.500 метри слободно кај жените Ледецки исплива – 15:25.48 минути и за 2.23 секунди го подобри светскиот рекорд. Воедно таа го одбрани златниот медал од претходното СП од Барселона. Среброто го освои Лорен Бојл од Нов Зеланд, а бронзата и припадна на Унгарката Богларка Капаш.

Во трката на 100 метри грбно кај жените Емили Сибом од Австралија победи со време 58.26 секунди, пред сонародничката Медисон Вилсон и Мие Нилсен од Данска.

Јулија Ефимова од Русија го освои првото место со време 1:05.66 минута во трката на 100 метри градно, вторастигна олимписката шампионка Литванката Рута Меилутите, трета  Алиа Еткинсон од Јамајка.

Кај мажите на 200 метри слободно златниот медал го освои Британецот Џејмс Гај со резултат – 1:45.14 минута. Среброто му припадна на Јанг Сун од Кина, а бронзата на светскиот рекордер Пол Бидерман од Германија.

На 100 грбно кај мажите прв стигна Мичел Ларкин од Австралија со време 52.40 секунди, а подиумот го комплетираа Камил Лакур од Франција (втор) и Мет Грејверс од САД (трет).

Адам Пити во полуфиналето на 50 метри градно исплива 26.42 секунди (светски рекорд) што беше за 20 стотинки подобро време од Ван дер Бург.