Бугарската историска комисија тврди дека македонската страна купува време

Првиот човек на историската бугарска комисија ги обвини своите македонски колеги за намерно одолговлекување на работата на комисијата за историски прашања. Година и пол седниците тапкале во место без никаков напредок, а на сите состаноци дневниот ред бил ист. Охридска архиепископија и Гоце Делчев..

Според Димитров, блокадата е диригирана од политиката во државата, која ја смета за млад сосед на Бугарија.

„Сакам да кажам дека таа веќе утврдена практика таму на одложување на времето на се што би можело да биде решено и кое би требало да биде решено, не е само тактика, повеќе е суштина на политичкиот живот на нашата „млада сосетка“. Тажното е што доктрината за македонизмот е политичка оска на државниот живот и од таму не се помесетува и сите се движат околу таа оска“, изјави Ангел Димитров во гостување на бугарската државна телевизија.

Дека мешовитата историска комисија подолг период нема успех пред два дена потврди и македонската страна. Последен пат историчарите се сретнале минатиот месец, но по дводневната работа, не бил постигнат никаков заклучок. Според Драги Ѓорѓиев неизвесно е кога ќе има резултат од заедничката работа, но смета дека дијалогот треба да продоложи.

Досега комисијата има договор за заедничко чествување на Цар Самоил, Светите Кирил и Методиј, Климент и Наум.

Следна средба на историчарите од двете држави е закажана за идниот месец.