Ди Марија ја напушта Бенфика

Аргентинскиот фудбалер Анхел ди Марија објави дека по завршување на оваа сезона ги напушта редовите на Бенфика, откако клубот не успеа да ја освои титулата во португалското првенство по ремито 1-1 против Брага во саботата, завршувајќи два бода зад шампионот Спортинг Лисабон.

Триесетиседумгодишниот Ди Марија, кој лани се пензионираше од репрезентативниот фудбал по 145 настапи за Аргентина, втор пат се врати во Бенфика во 2023 година, настапувајќи во меѓувреме и за Реал Мадрид, Манчестер Јунајтед, ПСЖ и Јувентус.

„Многу боли да се заврши сезоната на ваков начин. Ова беше мојот последен првенствен натпревар во овој дрес и горд сум што имав можност повторно да го носам“, напиша Ди Марија на својот Инстаграм профил.

„Сè уште имаме финале идната недела и ќе одиме таму со сета желба да го добиеме. Заедно, како и секогаш. Ви благодарам за вашата поддршка, навивачи на Бенфика“, додаде Ди Марија.

Бенфика ќе игра против Спортинг во финалето на Купот на Португалија на 25 мај, пред да ја почне својата кампања на Светското клупско првенство во САД на 16 јуни.

Ди Марија, чиј договор е со важност до 30 јуни, не обелодени дали ќе игра на Светското клупско првенство.