Дивац опериран по сообраќајна несреќа во Црна Гора

Прославениот српски кошаркар Владе Дивац е опериран, откако доживеа сообраќајната несреќа во четвртокот во Црна Гора, јавија претпладнево српските медиуми.

Дивац бил подложен на операција на колкот откако паднал од мотоцикл во близина на местото Луштица.

Дивац е во стабилна состојба и лекарите не очекуваат какви и да е компликации по извршената операција, јави телевизијата Нова.

Поранешниот југословенски и српски кошаркарски репрезентативец кариерата ја почна во 1983 година во Слога од Краљево, по што настапуваше за белградски Партизан од каде замине во НБА лигата и го носеше дресот на Лос Анџелес Лејкерс, Шарлот и Сакраменто.

Со сениорската репрезентација на Југославија освои вкупно 11 медали, вклучувајќи златни одличја од светските првенства во 1990 и 2002 година, како и од европските првенства во 1989, 1991 и 1995 година.