Долниот дом на Парламентот во Австралија го усвои предлог-законот за забрана за користење на социјалните мрежи за деца под 16 години

Долниот дом на австралискиот Парламент усвои закон со кој може да се забранат социјалните мрежи за деца под 16 години, што е една од најстрогите контроли на социјалните мрежи во светот.

Законот е усвоен со 102 гласа „за“ и 13 „против“, а се очекува наскоро Сенатот да го разгледа за да биде усвоен пред крајот на парламентарната година.

Премиерот Ентони Албанезе, кој е за тој закон, тврди дека прекумерната употреба на социјалните мрежи го загрозува физичкото и психичкото здравје на децата.

Иако Гугл и Мета побараа законот да се одложи додека не заврши тестирањето на системот за верификација на возраста, јавноста најмногу го поддржува законот, додека родителските групи го гледаат како клучна мерка за заштита на децата од кибер-малтретирање.

Анкетите покажаа дека 77 отсто од Австралијците ја поддржуваат забраната, додека противниците на законот наведуваат прашања за приватност и слобода на изразување.