Државниот обвинител положи заклетва, ВМРО-ДПМНЕ побара да го гони Спасовски

Новоизбраниот државен обвинител по свечената изјава пред собранискиот спикер не сакаше да каже јасно дали има основ да се истражува зошто на граѓаните им се издавале лични документи со старото име на државата.. Љупчо Коцевски вели обвинителството работело по поднесени пријави или допрен глас.

Додека Коцевски одговараше на прашањето за патните исправи, на неговото биро ВМРО-ДПМНЕ испорача кривична за случајот. Сметаат дека главен виновник за хаосот бил Спасовски, за кој велат дека две и пол години издавал документи за кои знаел дека наскоро нема да имаат важност.

Две ипол години тој ја донесува македонската јавност, граѓаните на Република Македонија во заблуда со ова негово постапување. Впрочем тој врши злоупотреба на службената положба и овластувања, и несовесно работење во службата.

Очекуваме од Јавното обвинителство да ја прифати кривичната пријава поднесена од ВМРО-ДПМНЕ и да отвори истрага за Оливер Спасовски бидејќи одговорност во оваа држава мора да има.

Апелираме и очекуваме дека новоизбраниот Јавен обвинител на Република Македонија ќе покаже дека е професионалец, а не дека е продолжена рака на власта во заминување на СДС и ДУИ.

За СДСМ, пријавата е политички монтирана. Одлуките на Техничкиот министер за внатрешни целосно го комплицираа процесот на издавање лични документи, велат од партијата.

Наместо решение, министерот на ДПМНЕ во техничката Влада направи дополнителен хаос, се обиде да создаде паника кај граѓаните со најави за казни и го комплицираше процесот за издавање пасоши.

Наместо да го зголеми капацитетот за сликање и вадење пасоши ДПМНЕ го укина вадењето пасош без закажување. Тоа негативно влијае затоа што го намалува бројот на граѓаните кои можат да се сликаат а од друга страна драстично го пролонгира процесот.