Фон дер Лајен: Шокантни беа сцените од погребот на Младиќ во Белград

Претседателката на Европската комисија, Урсула фон дер Лајен, по повод погребот на Ратко Младиќ, осуден за геноцид и воени злосторства, изјави дека сцените од тој настан во Белград се шокантни, а елементите на официјална поддршка и присуството на одредени високи српски функционери на погребот се длабоко за жалење.

„Сцените од вчерашниот погреб на Ратко Младиќ во Белград беа шокантни. Ратко Младиќ беше осуден воен злосторник. Тој беше одговорен за геноцид, воени злосторства и злосторства против човештвото. Почина додека отслужуваше доживотна казна затвор за геноцидот во Сребреница и други злосторства. Елементите на официјална поддршка и присуството на одредени високи српски функционери на погребот се длабоко за жалење. Тие покажуваат неуспех да се соочиме со темното поглавје од поновата европска историја и се во спротивност со вредностите врз кои почива патот на Србија кон Европската Унија.

Нашите мисли се со сите жртви на злосторствата извршени во земјите од поранешна Југославија“, напиша фон дер Лајен на X.

За Ратко Младиќ, поранешниот командант на војската на Република Српска, кој почина во Хаг додека каде издржуваше доживотна казна затвор за геноцид и воени злосторства, опело вчера служеше  српскиот патријарх Порфирије со сослужение на епископи на Српската православна црква (СПЦ).

Меѓу оние што дојдоа да му оддадат почит на Младиќ беа српски министри, лидерот на владејачката коалиција во Република Српска Милорад Додик, потоа Данило Вучиќ, син на претседателот на Србија, рускиот амбасадор Александар Боцан-Харченко.

МИА