Иницијатива на ЕУ за справување со трговијата со дрога низ европските пристаништа

Европската Унија, заедно со пристанишните власти на земјите-членки, започна нов јавно-приватен сојуз за зајакнување на експертизата, обезбедување подобри информации и осигурување помош во борбата против организираниот криминал и шверцот на дрога.

Овој сојуз е склучен во време кога заплените на кокаин во ЕУ достигнаа рекорд, со повеќе од 300 метрички тони дрога запленети годишно, се вели во официјалното соопштение на ЕУ.

„Европа има огромен проблем со организираниот криминал и знаеме дека дрогата е главен извор на приход“, рече комесарката за внатрешни работи Илва Јохансон на прес-конференција во белгиското пристаниште Антверпен, каде полицијата лани заплени рекордни 116 тони кокаин.