Иран започна напади врз нафтени капацитети во Саудиска Арабија

Саудиската државна нафтена компанија „Сауди Арамко“ ги прекина операциите во рафинеријата Рас Танура по нападот со беспилотни летала во областа, според извори запознаени со ситуацијата.

Рафинеријата, една од најголемите во Саудиска Арабија, има капацитет да преработува 550.000 барели сурова нафта дневно. Објектот на брегот на Персискиот Залив беше затворен во понеделник како мерка на претпазливост додека се проценуваат можните штети. Според изворите, пожарот на локацијата е ставен под контрола, пишува „Блумберг“.

„Арамко“ сè уште официјално не го коментираше инцидентот, а саудиските власти не одговорија веднаш на прашањата на медиумите.

„Рас Танура“ е една од најголемите и најважните рафинерии за нафта во Саудиска Арабија, во сопственост на државната компанија „Сауди Арамко“. Веднаш до рафинеријата се наоѓа еден од најголемите терминали за извоз на нафта во светот, што ја прави Рас Танура клучна точка за глобалното снабдување со енергетски производи.

Веста за затворањето доаѓа во време кога цените на нафтата скокнаа. Суровата нафта на лондонскиот пазар се тргуваше за 9,7 проценти поскапо откако САД и Израел нападнаа цели во Иран во текот на викендот, а Техеран одговори со стотици ракети и беспилотни летала кон земјите во регионот.

Поради својата локација во близина на Ормутскиот теснец, стратешки важна бродска рута низ која минува значителен дел од светската трговија со нафта, секое нарушување на рафинеријата би можело да има директно влијание врз цените на суровата нафта и стабилноста на енергетските пазари.

Рас Танура игра клучна улога во рафинирањето и извозот на саудиска нафта во Азија, Европа и Северна Америка, а аналитичарите ја сметаат за клучна алка во глобалниот енергетски синџир.