Извештај на ОН: Еден фемицид на секои 10 минути во светот

Според проценките на Обединетите нации, минатата година на секои 10 минути била убиена една жена или девојка од партнер или член на семејството.

Најновиот извештај за фемициди – убиства на жена или девојка поради нејзиниот пол – беше објавен вчера од Канцеларијата на Обединетите нации за дрога и криминал (УНОДК) и UN Women.

Во извештајот се вели дека околу 83.000 жени и девојки биле намерно убиени во светот во 2024 година. Во околу 60 отсто од тие случаи, сторителот бил член на семејството или партнер, соопштија телата на ОН при објавувањето на годишниот извештај на Меѓународниот ден за елиминација на насилството врз жените.

Спротивно на тоа, 11 проценти од машките убиства биле извршени од роднини или партнери.

Според податоците на ОН, фемицидите се особено чести во африканскиот регион, каде што е забележан најголем број фемициди во 2024 година, од 22.600. Азискиот регион следеше со 17.400, додека Америка имаше 7.700, Европа имаше 2.100 и Океанија 300.

Африка имаше највисока стапка на фемициди во кои жртвата и сторителот биле во интимна или семејна врска. Бројката таму беше три жртви на 100.000 жени или девојчиња. Во Европа, стапката беше најниска, 0,5.

Во 2023 година, околу 51.100 девојчиња и жени беа убиени од роднини или интимни партнери ширум светот од 85.000 жени и девојчиња кои починаа како резултат на насилен криминал, според извештајот од минатата година. 

МИА