Јовески заминува од функцијата јавен обвинител

Тврди дека институцијата ја направил отчетна и достапна, а од својот шест годишен мандат се прости со писмено соопштение. Обвинителот Јовески денеска го имаше последниот работен ден како шеф на републичкото обвинителство. Со задоволство ја извршувал функцијата, ама ниската доверба за институцијата со која раководеше, смета дека не се однесувала само на обвинителството. Пропусти имала и државата.

„Во последниот извештај на Европската комисија навистина се ниски оценките за борбата против корупцијата во земјава и од тоа не можеме да бидеме задоволни. Но, ниту една критика не е насочена директно кон обвинителството. Напротив, се инсистира државата да ги обезбеди и да ги зголеми ресурсите за непречена работа на Јавното обвинителство“

Според Јовески, обвинителството неосновна е напаѓано за својата работа, а причините ги лоцираше во непознавање на состојбите и надлежностите на институцијата, но како што пишува, можеби и намерно. Не им верува и на резултатите од јавното мислење.

На последниот ден од својот мандат, вината за лошата слика на обвинителството, Јовески ја адресираше кај анкетите. Смета дека теркот по кои се правеле за политичарите и партиите не биле соодветни да се мери и довербата на граѓаните во Јавното обвинителство.

Вели, секој си дозволувал да прави анкети кои создале атмосфера дека довербата е нереално многу ниска, иако според Јовески, граѓаните му верувале на обвинителството.. Доказ, биле зголемениот број на кривични пријави и малиот број жалби.

За релеванти, ги смета податоците од истражување на Светската банка кое наскорот требало да биде објавено, но во своето писмено обраќање, Јовески пренесува делови. На прашањето колку се ефикасни правосудните институции,

„Генерално, позитивна оценка дале 28% од граѓаните и 33% од бизнисмените. Запрашани за ефикасноста конкретно во нивниот предмет за оние што имале такво искуство 47% од граѓаните и 37% од бизнисмените рекле дека се задоволни“, пишува Јовески.

На заминување од функцијата, Јовески побара од своите колеги да ја чуваат обвинителската служба, од како што вели, поединци кои сакаат да ја валкаат професијата.

На местото на Јовески, од утре ќе застане Соња Симовска, која функцијата ќе ја извршува до изборот на нов обвинител. Во трка се тројца кандидати, а сите најавија дека прв приоритет ќе им биде транспарентноста во нивната работа и отчетност на институцијата.