Кипар активира систем за алармирање и засолништа поради судирот Израел-Иран

Властите на Кипар ја активираа апликацијата SafeCY, која обезбедува информации за локациите на најблиските засолништа и упатства за постапување при опасност, во услови на растечка тензија меѓу Израел и Иран.

Министерството за внатрешни работи на Кипар соопшти дека на островот има околу 2.200 безбедни простории и засолништа. Една од главните грижи е присуството на британски воени бази на островот, кои потенцијално би можеле да бидат цели на ирански напади. Најважната база е онаа во Акротири, западно од Лимасол, оддалечена само 275 километри од израелскиот град Хаифа.

Британскиот премиер Киер Стармер вчера соопшти дека борбени авиони, најверојатно „Тајфуни“, се префрлени на Кипар. На новинарско прашање дали тие ќе се користат за поддршка на Израел, Стармер не даде конкретен одговор.

Според медиумите, израелските авиокомпании префрлиле дел од своите авиони во Кипар од безбедносни причини. Радиото РИК јави дека безбедносните мерки на аеродромите во Ларнака и Пафос се засилени.

Жителите на јужниот дел на Кипар можат со голо око да ги набљудуваат воздушните напади и ракетните пресретнувања во далечина.