Леброн за суспензијата на Дончиќ: Не знам зошто судијата го сфати тоа толку лично

Лука Дончиќ беше исклучен поради двојна техничка грешка на натпреварот на Л.А.Лејкерс и Оклахома, а ситуацијата ја прокоментира и неговиот соиграч, Леброн Џејмс.

Судиите му доделија две технички грешки на Словенецот, втората на седум минути и 40 секунди до крајот на натпреварот, при резултат 108:107 во корист на „езерџиите“ и поради тоа тој мораше да го следи остатокот од натпреварот од соблекувалната. Првата техничка грешка беше досудена поради погрдни зборови кон судиите, а втората по расправија со навивач.

Леброн Џејмс разговараше со новинарите по поразот од Тандер, осврнувајќи се на однесувањето на Дончиќ пред да биде исфрлен.

-Не знам зошто судијата го сфати тоа толку лично. Тој веќе му даде една техничка грешка на Лука. Тој го знаеше тоа. Лука се расправаше со навивач кој седеше во близина на теренот, како што тоа обично го прави. Навивачите можат да кажуваат непријатни работи, без размислување, како и да е случајот, а Лука се расправаше со него и судијата претпостави дека е насочено кон него. Како и да е, тоа беа чудни неколку минути, рече Џејмс.