Мицкоски: Ахмети има редовна комуникација со Груби, го советувам да се врати и да се соочи со правдата

Али Ахмети има редовна комуникација со Груби и го советувам да се врати во земјава и да се соочи со правдата, порача премиерот Христијан Мицкоски во одговор на прашањето кога Артан Груби ќе се врати во земјава поставени при неговото гостување во вестите на ТВ Алсат.

- Кога ќе се врати Груби не знам, колку што успеав да го слушнам Меџити, тој кажа дека Ахмети има редовна комуникација со Груби и можеби тој треба да даде одговор кога ќе се врати. Јас би сакал да се врати уште денеска, затоа што единствениот начин да одговори на сите прашања е да биде тука присутен и да даде одговор, потенцираше Мицкоски.

Во однос на најавите од пред неколку месеци за обид за дестабилизација во земјава од страна на ДУИ и зошто сега нема такви изјави, Мицкоски рече дека обид за дестабилизација не значи и дека ќе успеат и додаде дека земјава е стабилна како никогаш досега.

- Обид за дестабилизација не значи и дека ќе успеат во тоа и дека ќе бидеме нестабилна држава. Како што гледате девет месеци не само што сме стабилна држава, туку и на меѓународен план постигнуваме такви пријателства  и такви сојузништва што се незапаметени во независна Македонија, нагласи Мицкоски.

За можна соработка со ДУИ, премиерот Мицкоски истакна дека е задоволен од соработката со коалицијата ВРЕДИ и односите во владината коалиција се кохезивни, цврсти, а, како што рече, цел на коалицијата е подобро утре за граѓаните и државата.

- Така работиме и ќе продолжиме да работиме, потенцираше Мицкоски.