Мицкоски: Подготвени сме да разговараме со Софија, но ставот на Владата и црвените линии се јасни

Премиерот Христијан Мицкоски денеска одговарајќи на новинарски прашања во врска со конкретни чекори за решавање на проблемот со Бугарија, рече дека е подготвен да седне да разговара, но оти е познат ставот на Владата по тоа прашање, како и црвените линии.

- Нашиот став е многу јасен, се знаат кои се црвените линии, ние сме ги опишале тие црвени линии многупати досега. Подготвени сме да седнеме и да разговараме, но не би било коректно некој да очекува дека оваа Влада додека сум јас премиер наеднаш ќе каже дека ова досега што го зборевме не важи, сега ќе седнеме и ќе направиме уставни измени. Барем јас додека сум претседател на Владата. Ако дојде некој друг нека тераат друга политика, одговори Мицкоски, по поставување камен-темелник на изградба на нова спортска сала во ООУ „Блаже Конески“ во Општина Аеродром.

Според Мицкоски, додека е тој претседател на Влада, „вакви предавства и капитулации нема да се случуваат“.

Премиерот Мицкоски во повеќер наврати кажа дека неговата Влада нема да дозволи уставни измени без конкретни обврски од источниот сосед и јасни гаранции од Европската Унија, при што истакна дека очекува и доследно почитување на меѓународното право како предуслов за напредок.

МИА