Министерство за енергетика: Над 100 предлози од јавноста за новиот Закон за рударство, ќе се прифатат конструктивните

За новиот Закон за рударство, за кој јавноста имаше можност 30 дена да го разгледа првичниот текст на ЕНЕР, заклучно со вчера до кога траеше јавниот увид пристигнати се над 100 предлози од кои ќе бидат прифатени конструктивните, информираат од Министерството за енергетика, рударство и минерални суровини (МЕРМС). 

Законот, посочуваат, уште во рана фаза беше јавно објавен на платформата ЕНЕР со цел да биде достапен за увид и анализа од сите засегнати страни, а јавната расправа резултираше со исклучително голем одзив. Пристигнаа бројни мислења, предлози и забелешки од компании, институции, стручната и граѓанската јавност.

-Јавната расправа ни овозможи вредни препораки и забелешки за Нацрт-законот. Паралелно започнуваме со следната фаза од усогласување на законскиот предлог. Ги разгледуваме сите доставени предлози и забелешки и ќе организираме работни средби со оние кои се изјасниле за предлог-текстот. Нашата цел е да добиеме усогласено, јасно и спроведливо законско решение кое ќе обезбеди заштита на животната средина, висока безбедност при работа и предвидлива инвестициска рамка, изјави министерката за енергетика, рударство и минерални суровини Сања Божиновска.

Со ова, додаде, Министерството уште еднаш потврдува дека е отворено за дијалог, соработка и заедничко креирање на законски решенија, со единствена цел – модерна и правична рамка за рударството во Македонија.

Најави дека во наредниот период, МЕРМС ќе ги разгледа детално сите пристигнати предлози и ќе ги прифати оние кои се во насока на подобрување на законското решение, во интерес на државата и граѓаните.

Од Министерството, пак, нагласуваат дека подготовката на законот да се води според највисоките европски стандарди, со цел да обезбеди современа и одржлива рамка за развој на рударството. Финалниот закон, прецизираат, ќе овозможи одржлива експлоатација и преработка на минерални суровини според највисоки стандарди, засилена контрола и транспарентност во сите процеси, задолжителни мерки за рекултивација и заштита на локалните заедници, јасна и правично поставена регулатива за сите учесници во секторот. Ќе се инсистира на строга примена на правилата и нулта толеранција за прекршувања, во интерес на безбедноста, заштитата на животната средина и добросостојбата на локалните заедници.

МИА