МВР воведува кодекс: Без тесни и куси здолништа, гол стомак, шорцеви, влечки, при вадење лични документи

Министерството за внатрешни работи ја информира јавноста дека со цел одржување на професионалниот стандард, дигнитетот на институцијата и меѓусебната почит, се воведува Кодекс за облекување за сите вработени и странки кои ги посетуваат просториите на Одделот за граѓански работи.

Како што посочуваат од МВР, како институција која е постојан сервис на граѓаните, соодветното облекување придонесува за подобра работна атмосфера и почитување на државните институции. Во таа насока, граѓаните се замолуваат при посета на шалтерите за подигнување лични документи, пасоши и други административни услуги да бидат облечени во рамки на општоприфатените норми за јавни институции.

Од МВР наведуваат дека како неприфатлива облека за влез во службените простории се сметаат премногу куси и тесни здолништа, куси панталони наменети за плажа или спортски настани, како и облека која прекумерно го открива стомакот, градите или долната облека.

Исто така, неприфатлива е облека која вообичаено се користи во домот, на плажа или во ноќни клубови, тренерки и спортска облека, облека со навредлива содржина, како и несоодветни обувки како влечки, папучи, кломпи, налани и апостолки.

Од Министерството додаваат дека и сите вработени во Одделот за граѓански работи се должни да го почитуваат утврдениот кодекс за облекување за вработените во МВР.