На ФФОСЗ промовирана нова современа дијагностичка опрема за тестирање на спортисти

На Факултет за физичко образование, спорт и здравје – Скопје вчера беше промовирана нова современа и високо софистицирана дијагностичка опрема за тестирање на физичките перформанси. Опремата е наменета за потребите на Институтот за научно-истражувачка работа во спортот и ќе се користи за лабораториски и теренски анализи на спортисти и студенти.

Инвестицијата е реализирана со поддршка од Сојуз на спортските федерации на Македонија и со сопствени средства на факултетот. Со новата технологија ќе се овозможи попрецизно следење и анализа на антропометриските карактеристики, телесната композиција и моторичките способности, како и подобрување на научната и стручната работа во областа на спортот.

На промоцијата присуствуваа деканот на факултетот Влатко Неделковски, раководителот на институтот Александар Ацески и претседателот на Сојуз на спортските федерации на Македонија, Мартин Клинчаров. Тие истакнаа дека инвестициите во современа технологија и научни капацитети се клучни за развојот на спортската наука и подобрување на резултатите на македонските спортисти.