Најмалку 25 лица загинаа, а 280.000 останаа без покрив над главата од почетокот на обилните дождови на Филипините

По монсунски дождови и поплави на Филипините, тропската бура Комај (наречена „Емонг“ на Филипините) денеска дополнително ја влоши ситуацијата во северниот дел од земјата, објави ДПА.

Најмалку 30 свлечишта се регистрирани во градот Багио, административниот регион Кордилера, објавија локалните власти. Според официјалните бројки, најмалку 25 лица загинаа низ целата земја откако започнаа обилните дождови пред околу една недела. Многу од жртвите се удавија.

Вкупно, околу три милиони луѓе се погодени од поплавите, а околу 280.000 останаа без покрив над главата.

Повеќе од 24.000 училишта се затворени, објавија филипинските медиуми. Училишните згради се користеа како центри за евакуација во 10 региони на островската нација.

Тропската бура Вифа предизвика хаос на Филипините и други делови од Југоисточна Азија кон средината на јули.

МИА