Нетанјаху денеска ќе разговара со Трамп, Путин и Стармер по нападот врз Иран

Израелскиот премиер Бенјамин Нетанјаху денеска ќе одржи телефонски разговори со американскиот претседател Доналд Трамп, рускиот претседател Владимир Путин и британскиот премиер Кир Стармер, по воздушниот напад што Израел го изврши врз Иран, соопшти неговиот кабинет.

Разговорот со Трамп е најавен пред 18:00 часот по израелско време (17 по македонско), пренесе весникот Тајмс оф Израел. Претходно денеска, Нетанјаху веќе разговарал со германскиот канцелар Фридрих Мерц и индискиот премиер Нарендра Моди.

„Лидерите покажаа разбирање за потребата на Израел да се брани од иранските закани за уништување. Премиерот нагласи дека ќе остане во контакт со нив и во наредните денови“, стои во соопштението.

Израелската армија синоќа започна воздушна операција против ирански цели, при што, според Тел Авив, биле гаѓани нуклеарни постројки, фабрики за балистички ракети и воени команданти, со цел да се спречи Иран во развој на нуклеарно оружје.