Николоски: Трасирањето на Коридор 8 е надлежност на Бехтел и Енка, за проблемите Владата праќа молби до нив

За проблемите на граѓаните кои излегуваат поради трасирањето на Коридор 8 од страна на конзорциумот Бехтел и Енка, Владата нема многу ингеренции и може само да ги замоли за помош. 

Вака одговори министерот за транспорт Александар Николоски, на новинарско прашање, дали Владата ќе им излезе во пресрет на жителите од гостиварско Здуње кои бараат трасата на Коридор 8 да не минува преку тамошните гробишта.

- Во однос на Коридор 8 таму изведувач е конзорциумот Бехтел и Енка. Согласно законите такви какви што се донесени од претходната Влада и надлежностите се целосно нивни, тие го прават проектирањето и тие го прават трасирањето. Она што можам да кажам е дека ќе поразговараме со нив. Ние правиме неделни состаноци и дека ќе разговараме. Веќе еднаш сме разговарале, имаше слични проблеми и на други места и ќе направиме се проблемот да се реши. Но треба да се свесни граѓаните дека заради законите на претходната Влада нашите надлежности се во рамки на буквално да замолиме, а не да нешто спроведеме или наредиме, истакна Николоски на денешната прес-конференцијата во Владата на новинарски прашања.

На прашање кога ќе се овозможи повторно железнички транспорт до Солун по дефект на пругата кај Поликастро, Николоски рече дека согласно одговорот од грчките власти тоа ќе биде за две недели од денес.