Барањето за екстрадиција на Палевски пристигна во Турција

Барањето за екстрадиција на Палевски пристигна во Турција. Од Македонското Министерство за правда велат добиле потврда дека документите со кои се бара враќање на осомничениот за убиството на Вања и Панче се во рацете на турските власти. Засега, непознато е колку долго ќе трае постапката.

Дали изјавите за згаснување на партијата чиј претседател беше Палевски, може тој да ги искористи за да ја избегне правдата во земјава заради политички прогон, министерот Спасовски не сака да коментира.

Во тек била истрагата и секоја информација, вели, може да штети во расветлувањето на двојното убиство.

„Кога е во истрага, сите шпекулации и се она што ќе го изнесуваме во јавноста, само може да штети на истрагата“, изјави Оливер Спасовски, министер за внатрешни работи. 

Заради текот на истрагата, Спасовски не одговори ниту дали има и други осомничени, ниту дали двете убиства се извршени со исто оружје. Најави одговорност ако се потврди дека полициски инспектор споделувал информации од истрагата на свои пријатели и познаници.

„За било каква активност којашто е нелегална и од било кого, дали е инспектор или е било кој друг, секако дека ќе се сноси одговорност доколку постои такво нешто. Меѓутоа не би сакал на ниво на шпекулации посебно не за еден ваков случај да зборуваме“, вели Спасовски.

Во меѓувреме од ВМРО-ДПМНЕ го обвинија Спасовски дека дал лажни информации поврзани со автомобилот на Жежовски. Од партијата велат поседувале доказ дека возилото во Скопје било и пред (27 ноември) денот на убиството на Вања.

„Како што веќе прашавме, а Спасовски одбива да одговори дали е точно дека возилото е регистрирано на системот "Безбеден Град" на 24 ноември во 6:30 и 25ти во 21:15 кај Маџари, денеска ќе потврдиме дека возилото е регистрирано на системот "Безбеден Град" во наведените термини и локација, што укажува на уште една лага на МВР Спасовски“, изјави Драган Ковачки, ВМРО-ДПМНЕ.

Од Демократскиот сојуз побараа МВР да достави информација до Собранието за двете убиства. Очекуваа во неа да бидат опфатени сите преземени активности на полицијата и другите служби за безбедност и додаваат дека парламентот треба да расправа и за можна политичка одговорност за случајот.  

За убиството на Вања и Панче во притвор се петмина. Првоосомничениот Палевски, пак, седми ден е во екстрадициски притвор во Турција.