Судски во среда ќе одлучува за разрешување на претседателката на Врховен суд

Беса Адеми во среда ќе дознае дали треба да го напушти претседателското место во Врховен. Тричлената комисија го напишала извештајот за кој сега ќе расправаат сите членови на Судскиот совет. Документот темелно го пренесува распитот на Адеми, ама нема насоки како да продолжи постапката. Беса Адеми во писмен став за Сител пишува дека очекува Судски при одлучувањето да ги почитува законите, ама и препораките на Оценската мисија на ЕУ.

„Сметам дека преку моето образложување на аргументите се укажа на повеќе аспекти во врска со оправданоста и основаноста на постапката и очекувам исход кој ќе биде заснован на принципот на владеење на правото и во согласност со констатациите на Оценската мисија на ЕУ“, пишува Беса Адеми, Претседател на Врховен суд.

Судски има неколку инструменти на располагање. Може да предложи разрешување, намалување на плата или запирање на постапката. Како опција законот понудил и привремено одземање на функцијата.

„Одлучувајќи по извештајот, Советот може времено да го оддалечи претседателот на судот од вршење на судиската функција, согласно со Законот за судовите“ пишува во Законот за судски совет.

Албанската опозиција смета дека иницијативата за разрешување е барање на ДУИ.. Миљазим Мустафа бил советник на неколку министри, а Селим Адеми поранешен секретар во општина Гостивар.

Претседателката на Врховен се соочи со разрешување откако кажа дека судот е под политички притисок да ја прифати амнестијата на поранешниот претседател Иванов.

Во меѓувреме, холандскиот амбасадор застана зад Беса Адеми. По средбата со лидерот на ДУИ, Јан Коп порача дека е недозволиво полиитчко влијание врз претседателката на Врховен и предизвика остра реакција од Холандија.