ТИРЗ: Koмпанијата за електрични автомобили нема добиено државна помош

Компанијата која требаше да произведува автомобили на струја, нема добиено државна помош, тврди првиот човек на Технолошко-индустриските развојни зони.

Одобрената сума од 40тина милиони евра, не легна на сметката на е.Го, тврди Деспотовски. Причина за откажување на инвестицијата која треба да вработи 900 луѓе, е нестабилноста на пазарот со електрични автомобили, велат од ТИРЗ.

Летото 2022 со голема промоција беше најавена изградбата на фабриката за електрични автомобили, а инвестицијата се проценуваше на 130 милиони евра. Според договорот, 35 отсто или над 40 милиони евра требаше да биде државна помош. Државата ја плати свеченоста за потпишување на договорот, фирмата не произведе ниту еден автомобил.

ВМРО-ДПМНЕ ги повика на одговорност функционерите кои го потпишале проектот. Од партијата велат дека владата во декември дала согласност за потпишување анекс на договорот за доделување државна помош на компанијата, па повика институциите да проверат колку буџетски пари се потрошени.

 „Уште еден од розевите меури од сапуница на власта пукна. Официјално се обелодени дека од помпезната најава за фабрика за електрични автомобили во Тетово, нема да има ништо. Повикуваме надлежните институции детално да го истражат случајот со државната помош за „фабриката за електрични автомобили““, велат од ВМРО-ДПМНЕ.

Реагираше и Социјалистичката партија на Македонија. Пропаднатиот проект велат е уште едно уназадување на економијата.

„СДС и ДУИ се претставуваат како партии за евроинтеграција, а всушност со економијата вршат дезинтеграција на економското ткиво на државата. Коруптивните зделки на власта пропаѓаат како и соништата за електричен автомобил, за автопатишта, за електроенергетски објекти и слични небулози“, велат од СПМ.

Речиси во исто време фирмата потпиша договор за производство на електрични автомобили и со Бугарија. Една година подоцна, дел од тамошните политичари објавија фотографии дека на локацијата предвидена за фабриката, изградена е фотоволтаична централа. Властите пак тврдат дека во тек е изградбата, а централата ќе произведувала струја за потребите на компанијата.