Ослободен од притвор возачот кој Палчо го пренесе до Турција

Возачот кој го пренесе Палчо до Турција излезе од притвор. По три месеци во истражниот затвор во Шутка, според обвинителството, законот повеќе не дозволувал Стефан Димковски да остане зад решетки. Како осомничен за помагање, изминало предвиденото време во кое можел да биде задржан во притвор.

„Со оглед на криивчното дело за кое е осомничено лицето и запретената затворска казна, максималното законски возможно траење на притворот за овој осомничен е три месеци. По истекот на тој рок,  притворската мерка за осомничениот е заменета со соодветни мерки на претпазливост“, велат од Јавното обвинителство.

Во текот на минатата недела Кривичниот суд го укинал притворот за возачот на Палчо. Сега, за Димковски има мерки на претпазливост. Не смее да седне зад воланот, а редовно ќе треба да се пријавува во судот.
„По предлог на надлежен Јавен обвинител за укинување на мерката притвор за С.Д и определување мерки на претпазливост, судија на претходна постапка му определи мерки, забрана за напуштање живеалиште, одземање патна исправа, обврска за јавување во суд и одземање, односо забрана за користење возачка дозвола“, информираат од Основен кривичен суд – Скопје.

Димковски е прв од петтемина осомничени за убиството на Вања и велешкиот фризер кој го напушти затворот во Шутка. Слобода се бара и за таткото на Вања. Дали и Александар Ѓорчевски ќе излезе од притвор, ќе се знае по утрешната јавна седница во Врховниот суд откако претходно Апелација не дозволи слобода за таткото на Вања.

Зад решетки се уште три лица кои се осомничени за убиството на 14 годишното девојче и 74 годишниот Жежовски.

Во притвор ама во Турција е и првоосомниченот Љупчо Палевски-Палчо. Од Министерството за правда велат очекуваат турските власти да ги информираат за екстрадицијата, но засега нема информации кога Палевски ќе биде донесен во земјава.

Тој е осомничен дека во ноември лани прво го убил велешанецот и го закопал во дупка, а со неговиот автомобил потоа го грабнал и застрелал и девојчето.