Лазаров: Воопшто нема да го потцениме Бриксен, одиме на победа и на реваншот

Лидерот во македонската Суперлига, тимот на Алкалоид в сабота ќе го одигра реваншот со Бриксен во осминафиналето на ЕХФ Европскиот куп.

По убедливата победа (44:32) на првата средба во Италија, македонскиот претставник е речиси во четвртфиналето. Сепак, тренерот Кирил Лазаров бара од своите избраници максимален пристап и на реваншот и во ниту еден момент да нема потценување на ривалот.

– Неочекувана висока победа на првиот натпревар против квалитетен противник. Резултатот не е реален. До 50 минути беше само четири разлика. Воопшто нема да го потцениме противникот. Ќе влеземе на реваншот максимално сериозно и одиме на уште една победа. Сега во фокусот ни е само Бриксен, а потоа ќе размислуваме за дербито со Еурофарм Пелистер кое е само по два дена од дуелот со италијанскиот тим, изјави Лазаров на денешната прес-конференција.

Слично размислува и репрезентативецот Мартин Велковски.

– Не се екипа за потценување. Играат модерен ракомет. Сепак, ние сме поквалитетни и очекувам уште една победа во меч на кој исто како и на првата средба да има многу голови. Ја повикувам нашата публика да дојде да не бодри како и на секој натпревар до сега и заеднички да го прославиме пласманот во четвртфиналето.

Натпреварот Алкалоид – Бриксен ќе се игра в сабота (22 февруари) со почеток во 18 часот во салата „Автокоманда“ во Скопје.

Алкалоид има максимални пет победи на петте досегашни натпревари во ЕХФ Европскиот куп.