Чешката скијачка Нова веќе не е во кома

Чешката алпска скијачка Тереза Нова, која тешко падна за време на тренингот пред спустот на Светскиот куп во Гармиш-Партенкирхен во јануари, е разбудена од индуцирана кома, објави денеска лекарскиот тим.

Дваесетиседумгодишната скијачка ќе биде транспортирана дома во Чешка, каде ќе продолжи со лекување.

При несреќата Нова со хеликоптер беше пренесена од патеката во клиника во Мурнау, Баварија, каде и беше констатирана тешка повреда на главата со крвавење, повреда на каротидна артерија и скршеница на очниот отвор.
Поради природата на повредите, таа беше ставена во индуцирана кома. По две недели, лекарите на одделот за интензивна нега почнаа со постепено будење со намалување на седативите.

„Кога отокот на мозокот се намали и крвавењето видливо се намали, пациентката беше доволно стабилна што можевме полека да ја разбудиме по консултација со нашите колеги неврохирурзи“, рече Маркус Грубер, главен лекар на одделот за интензивна нега во болницата Мурнау.

„Тереза сега е во стабилна состојба, што и овозможува безбеден транспорт до Чешка. Таму ќе биде подложена на серија дополнителни тестови и рехабилитација под надзор на специјалисти во локалната болница“, додаде Грубер.