Возачот кој со автомобил удри во толпа навивачи на Ливерпул останува во притвор

Британецот Пол Дојл, обвинет по седум точки за нанесување тешки телесни повреди со намера кога со автомобил удри во толпа луѓе за време на прославата на шампионската титула на Ливерпул, останува во притвор по неговото денешно прво појавување пред судот.

Инцидентот се случи во понеделникот попладне во Ливерпул, на прославата по повод освојувањето на титулата во Премиер лигата, кога 53-годишниот Дојл со автомобилот удри меѓу насобраните луѓе.

Вкупно 79 лица беа повредени, од кои четворица потешко, вклучувајќи и едно дете.

Повредените се на возраст од девет до 78 години.

По инцидентот, полицијата соопшти дека не станува збор за тероризам, но не утврди мотив.

Дојл денеска се појави на сослушување во Судот за прекршоци во Ливерпул и се изјасни за невин, објави телевизијата Скај.

Обвинет е за опасно возење и шест други точки од обвинението, вклучувајќи намерно предизвикување тешки телесни повреди.

Доколку биде осуден, Дојл би можел да се соочи со максимална казна доживотен затвор.