Обид за убиство Струга, едното лице го бодело оштетениот со нож во стомак и врат, другото лице довикувало да го „доврши“

Основното јавно обвинителство Струга донело наредба за спроведување истражна постапка против две лица, од кои едното е осомничено за кривични дела – обид за убиство и за насилство, а вториот осомничен му помогнал да го изврши обидот за убиство.

Државното Јавно обвинителство информира дека на 2 август, поради претходно нарушени меѓусебни односи, првиот осомничен се обидел да лиши од живот едно лице. Вториот осомничен најпрво со својот автомобил „бмв Х6“ го попречил патот на „фолксваген голф 7“ во кој се превезувал оштетениот и уште едно лице.

-Двајцата осомничени излегле и се упатиле кон оштетените и ги нападнале физички, најпрво удирајќи ги со боксови. Во еден момент првиот осомничен извадил нож и му нанел повеќе убодни рани на оштетениот во стомакот, надлактицата и вратот, со што му предизвикал тешки телесни повреди. За тоа време вториот осомничен извикувал и го поттикнувал да го доврши делото. Сведокот-оштетен се обидел да ги оттргне и да ги спречи, па првиот осомничен и врз него извршил насилство, расекувајќи го со ножот на раката и предизвикувајќи чувство на загрозеност и страв во јавноста, соопшти ЈОРСМ.

Јавниот обвинител до судијата на претходна постапка од Основниот суд во Струга доставил предлог за определување мерка притвор за двајцата осомничени.

МИА