Зеленски: Орбан нема да го запре движењето на Украина кон ЕУ, исто како што Русија не успеа

Унгарскиот премиер Виктор Орбан не може да го запре движењето на Украина кон Европската Унија, а неговите обиди да го блокира овој процес само ја покажуваат неговата поддршка за реториката на Москва, изјави украинскиот претседател Володимир Зеленски.

Американскиот претседател Доналд Трамп и унгарскиот премиер Виктор Орбан денеска ќе се сретнат во Белата куќа.

– На прво место, Орбан сака да го донесе Трамп во Унгарија на средба со Путин. Ако има средба – каде и да се одржи – таа дефинитивно ќе доведе до прекин на огнот и крај на војната, а Украина ќе ја поддржи, без оглед на нејзиниот формат. Но, ако ваквите состаноци се потребни само за „изборниот огномет“ на Орбан и нема да дадат резултати, тогаш не можеме да ги поддржиме, рече Зеленски.

Украинскиот претседател нагласи дека земјата може да се согласи на кое било можно место за преговори, освен за Русија и Белорусија – „а потоа сè ќе зависи од резултатот“.

Во исто време, украинскиот претседател изрази увереност дека за време на средбата на Орбан со Трамп, унгарскиот премиер ќе ги иницира енергетските прашања – особено санкциите против руските компании.

– Сите ги разбираат последиците од санкциите на Белата куќа. Орбан ќе бара начин да обезбеди посебен третман. Но, ние нема да поддржиме таков посебен третман. Не можеме да дозволиме Русите да профитираат од енергијата. Сепак ќе најдеме начин да обезбедиме руската нафта да исчезне од Европа. И многу е добро што и САД се заинтересирани за ова, нагласи Зеленски.

Тој, исто така, посочи дека за време на денешната средба меѓу Трамп и Орбан, унгарскиот премиер ќе инсистира дека Путин сака да ја заврши војната.

– Реториката на унгарскиот премиер не се разликува од онаа на Русија. Тој ќе каже дека Украина ја губи војната. Ова, во суштина, е руска услуга за пренесување на пораки во живо во Соединетите Држави, изјави Зеленски.

Зеленски истакна дека Украина нема ништо против Унгарија или нејзиниот народ, но не може да молчи кога раководството на соседна земја помага во ширењето на руската пропаганда.

„Ние не правиме ништо против унгарскиот народ и сме им благодарни. Не правиме ништо против унгарскиот лидер, но не можеме да дејствуваме како дипломати кога тие зборуваат такви работи за нас или да ѝ помагаме на Русија со реторика, дипломатија или други чекори. Ние го браниме нашето достоинство, слобода и независност, рече тој.

Според него, Орбан треба да се фокусира не на „омразата кон Украина“, туку на конструктивните односи и развојот на заедничката европска економија. 

МИА