Украинското разузнавање тврди дека Русите го заплашуваат унгарското малцинство

Украинската служба за безбедност (СБУ) вчера соопшти дека открила кампања за заплашување на унгарското малцинство во Украина, спроведена од руските служби.

СБУ соопшти дека открила „нова информативна и психолошка специјална операција на руските разузнавачки служби насочена кон дестабилизација на ситуацијата во регионот Закарпатија и ескалација на тензиите меѓу Украина и Унгарија“.

Закарпатската област е регион на Карпатите во западна Украина.

Според СБУ, „претставници на унгарската национална заедница“ во регионот примиле телефонски повици од „непознати лица кои се претставувале како членови на ’национал-патриотски формации‘, па дури и како службеници на украинските органи за спроведување на законот“, кои „барале од претставниците на заедницата да ја напуштат украинската територија и им се заканувале, меѓу другото, и со физичко насилство“.

Украинскиот министер за надворешни работи, Андриј Сибиха, на Х објави дека „операцијата го покажува обемот на руското мешање во унгарските избори на страната на Виктор Орбан. Не може да се исклучи дека таквата акција е направена во координација со неговата кампања“.

Унгарија традиционално делува како заштитник на унгарските малцинства во соседните земји. Во Украина живеат неколку десетици илјади етнички Унгарци, пренесува ДПА.

МИА