Војната во Иран и растот на цената на горивото ги загрозуваат плановите на европските авиокомпании за летната сезона

Европските авиокомпании се соочуваат со сериозни предизвици поради зголемувањето на цените на авио-горивото и нарушувањата на воздушните рути предизвикани од војната во Иран, што влијае врз планирањето на летната туристичка сезона.

Превозниците наведуваат дека од почетокот на конфликтот на 28 февруари цената на авио-горивото се зголемила за околу 84 проценти, при што се предупредува и на можен недостиг на гориво доколку ситуацијата не се стабилизира.

Експертите оценуваат дека актуелната криза претставува најголем предизвик за авиосообраќајот од ковид-пандемијата, иако побарувачката во индустријата засега останува стабилна.

Генералниот секретар на Меѓународната асоцијација за воздушен транспорт (ИАТА) предупреди на ризик од нарушувања во снабдувањето со гориво, особено во Европа и Азија, но нагласи дека ситуацијата се уште не е на ниво на кризата од 2020 година.

Европските авиокомпании, меѓу кои и големи превозници како IAG и други, се подготвуваат за објава на финансиските резултати, во мигови кога веќе почнаа со покачување на цените на билетите и намалување на капацитетите.

Кризата најмногу го засегна воздушниот сообраќај на Блискиот Исток, каде е забележано откажување летови и резервации, додека дел од европските превозници бележат стабилна или дури и зголемена побарувачка на одредени линии.

Аналитичарите наведуваат дека компаниите денес се поотпорни од претходните кризи, но оти високите трошоци за гориво и неизвесноста околу конфликтот и понатаму создаваат притисок врз индустријата, особено пред летната туристичка сезона. 

МИА