Италија и Балканот се соочуваат со топлотен бран

Италија и Балканот се зафатени со топлотен бран кој предизвика стотици смртни случаи и го наруши секојдневниот живот низ целиот континент повеќе од една недела, со зголемена загриженост поради ширењето пожари.

Преку Атлантикот, Националната метеоролошка служба предупреди на „опасна топлина со температури од 32,2 до 37,7 степени низ поголемиот дел од централните и источните САД“, во деновите пред прославите на 4 јули в сабота по повод 250-годишнината од Декларацијата за независност.

„Комбинацијата од продолжено дневно греење и ограничено ноќно олеснување ќе го зголеми ризикот од болести поврзани со топлината, особено за ранливите популации и оние без соодветно ладење“, додаде Националната метеоролошка служба.

За Западна Европа, каде температурите се намалија од рекордните јунски максимуми, има и предупредување дека повторно зголемување на температурите веројатно ќе има идната недела.

Во Италија, во 22 градови од Болцано на север до Палермо на јужниот остров Сицилија денеска е издадено црвено предупредување за високи температури. Две постари лица починаа од жештина во Џенова. Бројот на градови со црвенo предупредувањe се зголемува.

Поклониците во Ватикан користеа вентилатори за да се разладат и се засолнуваа под чадори за сенка додека папата Лав Четиринаесетти ја пренесуваше својата порака „Ангел Господов“ од балкон кон толпата подолу на празникот на светците Петар и Павле, празник на градот Рим.

Во Хрватска, метеоролошката служба издаде денеска црвен аларм за региони, вклучувајќи го главниот град Загреб и туристичките дестинации Сплит и Дубровник. Десетици пожарникари, потпомогнати од четири авиони, се справуваа со пожар во борови шуми на туристичкиот остров Вис во Јадранското Море, околу 55 км југозападно од Сплит.

Во соседна Србија, Државната хидрометеоролошка служба предупреди дека температурите денеска ќе достигнат 39 степени Целзиусови. Во Албанија, пак, пожар проголта многу хектари грмушки и маслинови дрвја во близина на јужното село Клос во текот на викендот.

Топлотниот бран, кој почна на 20 јуни, постави рекорди за почетокот на летото, а жешките услови го нарушија производството на електрична енергија, ја оштетија инфраструктурата и ги преоптоварија здравствените системи.

Франција пријави 1.000 дополнителни смртни случаи, кои се припишуваат на топлотниот бран. Француската агенција за јавно здравје соопшти дека повеќето од смртните случаи поврзани со топлината се однесуваат на постари лица и предупреди дека се очекува бројот да се зголеми.

Топлотниот бран би бил „практично невозможен“ без климатските промени предизвикани од човекот, што ги направи високите ноќни температури оваа недела 100 пати поверојатни отколку што би биле пред само две децении, според научниците.

МИА