ЕЦБ се очекува да ги зголеми каматните стапки бидејќи војната во Иран ја турка инфлацијата нагоре

Се очекува Европската централна банка (ЕЦБ) денеска да ги зголеми каматните стапки по вторпат оваа година како одговор на повисоката инфлација.

Економистите очекуваат ЕЦБ да ја зголеми својата стапка на депозитите, која е важна за штедачите и банките, од 2,25 проценти на 2,5 проценти. Одлуката на ЕЦБ ќе биде соопштена по состанокот на Управниот совет во Берлин. Централната банка ќе објави и нови прогнози за инфлацијата и економскиот раст во еврозоната.

Нафтениот шок предизвикан од војната во Иран ја турна инфлацијата нагоре, при што возачите го чувствуваат влијанието на бензинските пумпи, а сопствениците на домови се соочуваат со повисоки цени на маслото за греење. Нема знаци за решавање на конфликтот во Заливот.

Потрошувачките цени во еврозоната во август беа за 3,3 проценти повисоки во споредба со една година порано, што е највисока стапка на инфлација од септември 2023 година и е значително над среднорочната цел на ЕЦБ од 2 проценти.

Во Германија, високите цени на енергијата ја турнаа инфлацијата до 2,9 проценти во август.

Повисоките каматни стапки можат да помогнат во сузбивањето на инфлацијата со тоа што ќе го направат задолжувањето поскапо и ќе ја намалат побарувачката. Штедачите можат да имаат корист од повисоките стапки доколку банките ги пренесат врз нив, додека повисоките трошоци за задолжување тежат врз инвестициите.

МИА