Основци од Кавадарци се соочуваат со затвор за монтирање фотографии на соученички

Шестмина основци од Кавадарци се соочуваат со затвор од една година заради кражба и монтирање фотографии од свои соученици. Деветтодделенци се осомничени за Злоупотреба на лични податоци.. Без знаење и дозвола од девојчињата со кои учеле, краделе слики од нивните профили на социјалните мрежи, а потоа ги исмејувале.

„Малолетниците, сите ученици во деветто одделениe во основно училиште, како соизвршители, неовластено преземале приватни фотографии од нивни  соученички, ги монтирале и меѓусебно ги споделувале со врсници, со цел да ги навредат и исмеваат и да нанесат штета на угледот на оштетените“, велат од обвинителството.

Пред три месеци полицијата и обвинителството ја почнале истрагата за учениците. Случајот го пријавиле родители на девојчињата чии слики монитрани со недолична содржина се разменувале на социјалните мрежи. Биле одземени мобилни телефони и компјутери за вештачење, кои ги потврдиле сомневањата за шестмината деветтоодделеници од Кавадарци.

Според експертите, зголемена е кражбата на фотографии и нивна злоупотреба од социјалните мрежи. Често, жртви биле и деца, па психолозите предупредуваат дека е неопходна поголема контрола од родителите.

„Дел од децата се оставани пред интернет алатки и социјални мрежи без надзор. Значи, никој не гледа тие што прават на социјалните мрежи, па иако ќе се објават вакви настани, имаме коментари кои се прилично одвратни, кои деца не би требало  да ги читаат.

„Еден просечен родител мене ми вели дека му е страв да го воспита детето да биде културно и со пристојно однесување, заради тоа што може да стане потенцијална жртва на насилство или булинг. Замислете која криза за нас е ова како систем да родителите се мислат дали позитивното родителство е начин на воспитување е добар за средина  во која живеат нивните деца“, изјави Давид Тасевски, Психолог.

 Според последите податоци на Агенцијата за заштита на лични податоци кои се однесуваат на 2022та, имало вкупно 233 преставки за злоупотреба на податоци од социјалните мрежи, најмногу од пријавите биле за профили од фејсбук.

Во кавадаречкото училиште молк. Иако вети во кусиот телефонски разговор, директорката не даде објаснување за случајот ниту дали се планирани санкции за учениците.