Почина еден од најуспешните винопроизводители во светот, Жозеп Ферер Сала

Шпанскиот винопроизводител Жозеп Ферер Сала – човекот кој стои зад едно од најуспешните и најпознати пенливи вина во светот, „Фрешенет“ (Freixenet), почина на возраст од 99 години.

’Фрешенет’ со жалење објавува дека Жозеп Ферер Сала – почесен претседател на компанијата, почина на 99-годишна возраст. Роден на 19 октомври 1925 во Сант Садурни д’Аноја (Каталонија, з.п.), Ферер работеше повеќе од 70 години, станувајќи еден од главни креатори на светската водечка група на пенливи вина со коишто тој отсекогаш остана поврзан“, соопшти винската компанија.

Тој ја воведе компанијата во нова ера.

„Член на втората генерација на основачкото семејство, Жозеп Ферер остави неизбришливо наследство во историјата на ‘Фрешенет’ – бренд создаден во 1914. од неговите родители“, се додава.

Влегувањето на Жозеп Ферер во компанијата во 1947. е почеток на нова ера за семејната фирма. Го презел генералното менаџирање во 1959., а во 1978 година е назначен за претседател на „Фрешенет“. Меѓу најважните достигнувања под негово раководство се модернизацијата на производниот простор, проширувањето на магацинот, зголемувањето на продажбата, и можеби најбитно – меѓународното проширување. Ферер успеал да ја направи „Фрешенет кава“ – најпродавана кава во светот.