Почина Васил Рингов

На 70-годишна возраст, по кратко боледување, почина Васил Рингов, поранешен македонски и југословенски репрезентативец и еден од најзначајните фудбалери во историјата на македонскиот фудбал.

Рингов фудбалската кариера ја започна во Беласица, по што настапуваше за Партизан, Тетекс и Вардар. Најдлабока трага остави токму во дресот на вардарци, каде што ја имаше најуспешната фаза од својата кариера.

За „црвено-црните“ одигра над 200 првенствени натпревари и постигна 93 погодоци, со што се вбројува меѓу најистакнатите имиња на клубот во текот на 1980-тите години.

Со својата игра, професионализам и посветеност, Васил Рингов остави силен белег во македонскиот и поранешниот југословенски фудбал.