Правосудството во колапс, доверба немаат граѓаните, ниту фелата

На скалилото до 10, довербата во правосудниот систем, годинава се спушти близу нулата. Анализи, статистики, анкети -домашни и странски, пресметаа - во законска работа на судовите и обвинителствата верува околу 2,5 отсто од населението. Прстот е вперен кон телото кое се грижи за состојбите во судството. Но, за членовите на Судски, како поважна да беше нивната положба во советот. Имале нарушени меѓучовечки односи, а виновна била претседателката. Ја разрешија.

Денови беа потребни да се стишат високите тонови во салата. Изборот на нов претседател требаше да ја смали бучавата, ама за двајца членови, ни тоа не беше доволно, па излегоа од советот. Под неразјаснети околности зградата ја запоседнаа и духови кои разместувале ствари по канцеларии, а нивните сенки на безбедносните камери ги бараше и полицијата. Гласот од Судски се слушна дури до Брисел, па во советот влезе тим експерти да спречи ширење на звукот.

Внатрешните проблеми кои ги детектираше оценската мисија, не беа пречка Судски да почне битка на македонско тло. Побара разрешување на претседателката на Врховниот суд која се пожали на политички притисоци. За таквите состојби, требало да бара заштита од советот.

Годинава во земјава беше прогласена епидемија на корупција. Не ја препознале домашните институции, ама ја гледале и надвор од европскиот континент.

Американскиот Стејт Департмен, во неколку наврати ја надополни црната листа заради вмешаност во значителна корупција и мешање во судски предмети. На неколкумина македонски државјани им забрани влез во САД и ги прекина нивните економските врски со тамошните компании. Градоначалник, бизнисмен, екс висок владин функционер, но, тие нема долго да останат последни на листата, тврдат американските претставници.

Веќе разнишаната доверба во правосудството доби поддршка и од власта. Преку ноќ донесе одлука за намалување на казните и застарување на делата по кои се гонеа поранешни функционери. За измените во кривичниот законик не знаел никој од фелата.

Додека некои долгогодишни учесници во случаи на СЈО заради донесените измени му завртеа грб на судот, други кои ги гонеше редовното обвинителство, слушаа зошто треба да одат во затвор. Двајца владини секретари беа огласени за виновни. За некои пак, пресудата беше поттик да заплива во брачните води.

Ниската доверба не беше пречка дел од судиите да побараат унапредување, а некои и за првпат да облечат судиска тога. Подмладокот во обвинителската служба пак се заколна дека ќе работи на подобрување на состојбите, а во враќање на довербата, ќе учествуваат сопругата на обвинителот Абази и синот на собранискиот спикер Џафери.

Смена во раководството доби и обвинителскиот совет. По истек на мандатот на Јолевски, го замени Димитриеска. На крајот од 2023 со шест годишниот мандат се збогува и шефот на Државното обвинителство.

Правосудниот систем се тресеше и на последниот работен ден од годината која изминува. Разрешената претседателка на Судски треба да се врати на чело на советот, одлучи Управниот суд. 

Кој во иднина ќе го води телото на кое не му веруваат ниту судиите, ќе се дознае во новата година.