Преглед на вестите од светот

Американскиот претседател Доналд Трамп, изјави дека не е задоволен од однесувањето на рускиот претседател Владимир Путин и рече дека разгледува нови санкции против Русија.Тој убива многу луѓе, главно свои и украински војници. Бројот на загинати сега изнесува до 7.000 неделно. 

Тој повтори дека војната во Украина „никогаш не требало да се случи“ и дека треба да заврши бидејќи „многу луѓе умираат“. Коментарите на Трамп следуваа помалку од 24 часа откако тој потврди дека Вашингтон ќе продолжи со испораките на оружје за Киев во екот на тековните руски воздушни напади. Тоа дојде само неколку дена откако Пентагон ги запре испораките за да преиспита дали моменталните залихи се доволни за американските одбранбени потреби.

Израелската војска издаде нови наредби за евакуација на илјадници Палестинци во Кан Јунис, на југот на Појасот Газа, принудувајќи ги да бегаат на запад додека борбите продолжуваат. Подрачјето за евакуација опфаќа главни станбени зони и хуманитарни центри, како што се болницата Насер, бегалски камп и околината на една црква, пренесува палестинската агенција Вафа. Израелската војска ги предупреди жителите да не се враќаат во овие зони, нарекувајќи ги „опасни борбени подрачја“.

Истакнат командант на Хамас Мехран Мустафа Баџур е убиен во израелски воздушен напад во северниот крајбрежен град Триполи во Либан, соопшти израелската војска. Баџур во последниве години извршил бројни напади врз Израел. ИДФ наведува дека неговото убиство е „значаен удар“ за активностите во Либан на терористичката група чие седиште е во Газа.

Најмалку 111 лица загинаа, а над 172 се водат како исчезнати заклучно со вчерашниот ден откако катастрофалните поплави го погодија американскиот Тексашки ридски округ, а спасувачките операции сè уште се во тек по должината на реката Гвадалупе. Меѓу исчезнатите има уште пет кампери – деца, а полицијата во округот Кер соопшти дека стотици спасувачи сè уште работат на операции за пребарување и спасување и расчистуваат остатоци во близина на летниот камп.