Претседателката го свика Советот за безбедност - Една од темите состојбата со пожарите

Состојба со пожарите го вклучи алармот кај државниот врв. Претседателката Гордана Силјановска Давкова за утре напладне го свика Советот за безбедност. На состанокот ќе биде присутен целиот државен врв- собранискиот спикер, Африм Гаши, премиерот Мицкоски, министерот за внатрешни работи Тошковски, за одбрана Мисајловски, шефот на дипломатијата Муцунски и тројца членови именувани од претседателката – Џевдет Хајредини, Малинка Ристевска-Јорданова и Владо Спиридонов.

Поради сериозноста со пламените јазици кои дивеат на истокот од државата и вклучениот европски аларм за помош, утрешниот Совет треба да даде одговор дали е загрозена безбедноста на државата и каква стратегија може да ја надмине кризата.

Затоа на покана на претседателката на состанокот ќе присуствуваат и директорот на Агенцијата за национална безбедност, Бојан Христовски, директорката на Агенцијата за разузнавање, Габриела Јаковлева и директорот на Дирекцијата за заштита и спасување, Стојанче Ангелов.

Не е исклучено освен за состојбата со пожарите, државниот врв да разговара и за актуелната состојба со македонските интеграции.

Утрешната ќе биде втора седница на највисокото советодавно тело во земјата по конститутивната што се одржа на 4 ноември лани.