Претседателката на Врховен доби лекции по кривично право и закана дека ќе оди во затвор

- Барам Судскиот совет да утврди одговорност кај Адеми и истата да ја разреши, изјави Миљазим Мустафа.

Ова е предлогот на членот на Судски кој очекува казна за претседателката на Врховниот суд за недоаѓање на седници и одбивање на поканата за средба. Ова се официјалните причини за барањето за разрешување, ама на денешното соочување се откри дека изјавата на Адеми за политички притисоци врз врховните судии за аболициите на поранешниот претседател на државата била пресудна да се побара нејзина одговорност.

Цели три часа, се соочуваа аргументите. Дека претседателката на Врховниот суд не треба да е присутна на седниците напишала и оценската мисија која ја скенираше состојбата во Советот. Но, за подносителот на барањето, моменталните закони предвидувале дека мора да учествува во неговата работа. Со своето однесување покажала непрофесионалност и правна некултура, а доби и потсетување дека се оди во затвор ако не го информира обвинителството за политичките притисоци кон врховните судии.

Претседателката на Врховен доби и лекции по кривично право од подносителот на барањето за разрешување бидејќи таа била граѓанска судијка. Ја обвиниле дека за својата одбрана барала и помош од публиката откако Адеми кратко проговори со лице во салата кое седеше зад неа. 

Покрај Адеми беа претседателот на здружението на Судии и адвокат според кој иднината на македонското судство зависи од исходот на постапката за разрешување на Врховниот суд. 

Дали Адеми ќе се збогува од претседателското место во Врховен ќе се знае откако тричлената комисија ќе го напише извештајот од денешното соочување. Документот потоа ќе оди пред членовите на советот кои на седница ќе одлучат за иднината на првиот врховен судија.