Радосна вест од Скопска ЗОО: Џуџестите мармозети добија близначиња

Скопската зоолошка градина се пофали со радосна вест – еден од паровите џуџести мармозети доби близначиња. Станува збор за најмалите мајмуни на светот, кои во зрелоста тежат најмногу до 100 грама.

Поради нивната минијатурна големина, двете бебиња сè уште тешко се забележуваат со голо око. Тие постојано се на грбот на својата мајка, додека за нивната грижа е вклучена целата група, што е карактеристично за овој вид.

Од Скопска ЗОО велат дека приновата е уште еден позитивен показател за добрите услови и успешната грижа за животните во градината, а посетителите ќе имаат можност да ги видат малите мармозети во наредниот период.