Реализирани 750 исплати денеска во „Алта банка“ во Битола, Струмица и Тетово, овозможени и уплати за комуналии и отплата на кредити

Продолжува исплатата на средствата на клиентите на „АЛТА банка“ АД Битола кои имаат платежни сметки во Банката, но не располагаат со платежни картички. Од денеска, покрај во Битола, исплатата се врши и на шалтерите во Тетово и Струмица, каде што граѓаните можат да подигнат до 20.000 денари.

Според информациите од Народната банка, во текот на денешниот ден во трите града биле реализирани вкупно 750 исплати. Процесот се одвива непречено, со добра организација и согласно утврдената динамика.

- Од денеска, клиентите на Банката на шалтерите во Битола, Струмица и Тетово можат да вршат и уплати за комунални услуги, како и да ги намируваат обврските за отплата на кредитите. Со ова се овозможува полесно извршување на дел од нивните тековни финансиски обврски - се додава во соопштението.

Народната банка потсетува дека од оваа недела е зголемен и неделниот лимит за подигање готовина и плаќања на продажните места со платежните картички на Банката, од 10.000 на 15.000 денари.

- Народната банка континуирано ја следи состојбата и презема активности за постепено олеснување на условите за располагање со средствата на клиентите на „Алта банка“ АД - Битола. Приоритет останува обезбедувањето пристап до нивните средства и непречено извршување на платежните услуги за клиентите на Банката - се нагласува во соопштението. 

МИА