Роналдо: СП2026 ќе биде мое последно, а ќе играм уште година, две

Португалскиот фудбалер Кристијано Роналдо изјави денеска дека Светското првенство во 2026 година ќе биде негово последно, а ќе продолжи да игра фудбал на професионално ниво уште година или две.

Роналдо, кој постигна над 950 голови на клупско и репрезентативно ниво, дебитираше како тинејџер во лисабонски Спортинг во 2002 година и во интервјуто најави дека наскоро ќе се пензионира за да поминува повеќе време со своето семејство.

На прашањето за време на видеоконференција на туристичкиот форум во Ријад дали Светското првенство во 2026 година ќе биде негово последно, петкратниот освојувач на „Златната топка“ одговори: „Да, дефинитивно. Ќе имам 41 година и мислам дека тоа ќе биде вистинскиот момент“.

Светското првенство во 2026 година ќе се одржи во САД, Канада и Мексико. Роналдо го продолжи договорот со саудискиот клуб Ал-Наср до 2027 година во јуни, а 40-годишниот Португалец се стреми и кон следното Светско првенство, единствената голема титула што недостасува во неговата колекција трофеи.

„Во моментов навистина уживам. Како што знаете, во фудбалот, кога ќе достигнете одредена возраст, месеците минуваат многу брзо. Се чувствувам навистина добро во моментов. Постигнувам голови, сè уште се чувствувам брз и остар. Уживам во мојата игра со репрезентацијата. Но, секако, да бидеме искрени. Она што го мислам под „наскоро“ е веројатно една или две години“, рече Роналдо. 

МИА