Русија планира изградба на 38 нови нуклеарни реактори

Русија, еден од најголемите корисници на нуклеарна енергија, сака значително да го зголеми својот капацитет, јави ДПА.

Претседателот Владимир Путин постави цел во следните две децении Русија да се зголеми уделот на нуклеарната енергија во вкупното производство од сегашното ниво од малку помалку од 20 отсто на 25 отсто, пренесува германската агенција.

Планот денеска го објави Алексеј Лихачев, првиот човек на компанијата за нуклеарна енергија „Росатом“, на конференцијата на Меѓународната агенција за атомска енергија (МААЕ) во Виена.

Лихачев рече дека планот е да се изградат уште 38 големи, средни и мали реакторски единици, објавија првично руските медиуми, пренесени од ДПА.

Со ова приближно двојно би се зголемил бројот на реакторски единици што моментално работат во Русија.

Податоците на МААЕ покажуваат дека уште пет големи единици се веќе во изградба во Русија. Покрај тоа, Русија ја изгради својата прва пловечка нуклеарна централа, која го снабдува северниот сибирски град Певек од 2022 година.

Руските трупи од 2022 година ја држат под окупација украинската нуклеарна централа „Запорожје“, која, со седум реактори, е најголемиот нуклеарен објект во Европа, потсетува ДПА.

МИА