САД го прошируваат списокот на производи од челик и алуминиум со високи царини, автоиндустријата реагира

Американското Министерство за трговија објави дека ја проширува листата на царини на производи од челик и алуминиум, со што се опфатени повеќе од 400 категории, вклучувајќи ветерници, домаќински апарати, тешка механизација, железнички вагони, мотоцикли, бродски мотори, мебел и стотици други производи.

На овие производи ќе се применува царина од 50 отсто за содржината на челик и алуминиум, додека остатокот ќе биде оданочен со редовната државна стапка.

Според финансиската компанија „Еверкор ИСИ“, мерката опфаќа увоз вреден над 200 милијарди долари минатата година и ќе ја зголеми ефективната царинска стапка за околу еден процентен поен.

На новата листа се наоѓаат и автомобилски издувни системи, електричен челик за производство на електрични возила, делови за автобуси и клима-уреди, како и апарати како фрижидери, замрзнувачи и сушари.

Група странски производители на автомобили предупредија дека САД немаат доволни домашни капацитети за да ја задоволат побарувачката.

Компанијата „Тесла“ неуспешно бараше исклучување на челичните производи што се користат во електромоторите и ветерниците, наведувајќи дека во земјата нема производствени можности за тој вид челик.

Новите тарифи стапуваат во сила веднаш и опфаќаат и компресори, пумпи, како и метал во амбалажа за козметика и производи за лична хигиена.

– Оваа акција го проширува опсегот на царините и ја поддржува ревитализацијата на американската челична и алуминиумска индустрија, изјави заменик-секретарот за трговија Џефри Кеслер.

Производителите на челик претходно доставија петиција до администрацијата со барање да се прошират царините и на дополнителни автомобилски делови.

МИА